近排都係鍾意去小店食嘢，嚟到嵐屋就完全感受到日式小店嘅氣氛。
嵐屋喺慈雲山一條唔算多人行嘅小巷轉角，位置不算太起眼。
室內亦都唔算大，5張枱大約坐到廿個客人，但入面嘅裝修都好重日式味道，而且有好多酒包裝。因為已經過咗午飯嘅平日接近落場時間，舖頭比較少人，可以聽下舖頭播嘅日文歌。
午飯時間有定食set 提供，52蚊一個set 價錢合理。
咖喱吉列豬排飯上菜，同相片唯一不同嘅係咖喱分開上，唔會令咖喱浸淋吉列豬排，賣樣亦非常討好。
吉列豬排有5大塊，咬落香脆唔油膩，而豬排鬆軟帶少許油脂香，雞蛋裡挑骨頭的話只係外層略唔夠鬆化，但整體吉列豬扒非常高質。
咖喱汁唔係用粉或者磚開嘅普通貨式，而係有落埋其他材料嘅，沾上豬排唔會濃到搶咗豬排嘅香。
估唔到特登走上嚟慈雲山食嘢會搵到間好嘢，而店員亦都非常有禮貌，真係「黃藍是政見，好食是良知」，呢間絕對係一間有良知嘅小店，值得多多支持。
抗疫時期小店都唔鬆懈，提供酒精搓手液同消毒濕紙巾，俾客人食飯前後同戴口罩用
作為良心小店，宣傳品不會缺少。
舖內黑板有寫上新鮮食材，想食咩好嘢就望下先。
有好多酒包裝。
嵐屋
地址：慈雲山蒲蕙里6-8號蒲蕙樓地下8號舖
電話：23101220
FB：https://www.facebook.com/arashiltd/
注意有落場及休息時間
