[2015-10-21 更新]
老闆剛通知Matt，他們更換了廚房員工和營業時間，要去這食堂朋友要先查詢最新的營業時間和菜單以免撲空哩～
作為一個九龍灣工作過嘅人，深明要搵一間又平又快又好食嘅食肆唔係件易事，晚飯嘅話更離唔開果三幾間，比較有人氣嘅就係以前喺牛下嘅嗰間利來大排檔，晚飯係唔錯，不過地下跣過鬼兼價錢貴，有時食晏啲阿姐仲好唔客氣，畀我哋改左佢個名做「食面」，全名「食貓面」。
講「食貓面」，真係比唔上以前嘅恆豐食堂，去親食嘢啲員工都好似仲未起身咁，又或者你差佢錢咁，總之一副唔憂做嘅樣，味道非常麻麻但唯一好處就係佢舖面夠大唔洗等位。
但係神奇嘅事就發生啦，原來恆豐食堂近排已經轉左手，接手做老闆果位仲要係我朋友！所以絕對要去試一下手勢，睇下宜家咩環境。
環境篇
環境依舊，人面真係全非！
宜家全部員工同以前嘅已經完全唔同，態度食物都大大改善晒。
牆身依然好本土味道貼晒餐牌係度，一目了然。
再細心留意下面食係用出前一丁！唔洗加錢！以$30 一個常餐有出前一丁嚟計，或者$20 一個下午茶面餐嚟計，真係好抵
好啦，咁其實嚟係食晚飯嘅，話說以前嘅恆豐食堂係唔做晚市，宜家佢地有做埋晚市，仲要做到11點添，老闆娘熱烈推介話好好食，雖然係朋友，但係講到食，邊個都無面畀，好食就話好食，唔好食就話唔好食，咁先得中肯有進步架嘛。
戲玉所在！食物篇
先嚟個小食炸大腸 $30
炸大腸炸得外面香脆，入面鬆化唔韌，其實人地近排想減肥，但係食咗一舊就停唔到口......
再嚟個菠蘿生炒骨 $50 （連飯&湯套餐$55）
生炒骨最重要係就炸得夠靚，呢點佢地的確做到，新鮮炸出嚟既粒粒肉都好酥脆，同枱朋友覺得唔夠酸，我覺得還好，可以再酸點，但最怕過酸.......
接住落黎係西蘭花炒鮮魷 $55 （連飯&湯套餐$60）
好啦，我已經要講句，食埋呢餐先減肥啦，個西蘭花真係炒得好香，而鮮魷呢，好老實因為係新鮮關係日日唔同質素，但今日呢個炒得唔錯，唔係橡膠嚟，有咬口唔痴牙，成碟菜都夠晒鑊氣。
仲有老闆娘極度推介嘅川菜，有一號佳麗－口水雞 $80 半隻 $150 一隻
呢度已經半隻已經係一碟嚟，口水雞個辣汁係佢嘅精華所在，呢個辣汁不得了，雖然話係朋友開有加分，但係真係好好食，佢嘅辣唔係辣到食唔果隻，係慢慢滲出嚟嘅辣，而雞都知唔會係新鮮雞嚟，不過雞肉唔韌唔鞋口，處理得啱啱好。
如果食得辣可以食中辣甚至大辣添，我哋呢啲食小辣就啱啱好。
同埋係即刻整所以雞會熱啲，如果放涼左小小食就仲一流！
仲有仲有，要撈埋蔥蒜一齊食，提升味道～
跟住落就係老闆娘極度推介川菜二號佳麗－水煮牛肉 $70
見到紅卜卜同咁多辣椒就以為辣到噴火啦，食落真係辣，係帶香同麻嘅辣同埋越辣越想食果隻，見到牛肉浮晒面就知足料（不過呢，有朋友以為水煮牛肉個底有魚囉XDD 我哋仲笑左佢好耐）
呢個水煮牛肉嘅主要材料係牛肉，牛肉鮮味香滑無根（無魚架，要食魚就要食水煮魚知無？）
配料有芽菜，拍青瓜，識食水煮牛肉／水煮魚嘅實會食埋呢啲配料，因為佢哋吸收晒辣汁嘅精華！
以上嘅食物全部都好啱香港人口味兼好味，我哋幾個朋友都十分讚好，再加上老闆係朋友就加到爆晒燈添，話我Hard Sell 都係咁話。
好野梗係要分享。仲等埋發叔？No Way！咁慢唔等佢啦，繼續約左其他朋友再去晚飯啦！XD（喂，說好的減肥呢......？）
By the way，同朋友傾落做食肆真係用好多時間，仲有好多嘢要靠晒大廚，食肆大廚真係唔易做，又有心又整得好嘅廚師更難得！
餐牌篇
睇過Overall 餐牌，不論早、午、茶、晚市價錢都非常實惠大眾化，收工約食飯都可以係度食埋，住德福嘅人想食炒小菜晚飯更加多個又近又抵又好食嘅選擇。
區外人開車過嚟食都係個唔錯嘅選擇，附近有唔少停車場同埋呢啲工商業區夜晚泊停無咁大限制。（殊！）
_______________________________________________________________________
恆豐食堂（稍後將會正式改名為大眾食堂）
地址：九龍灣臨興街32號美羅中心1 期地下
地圖：按我 （九龍灣站 B / C出口，穿過德福廣場及德福花園步行約7-10分鐘可到達。步行路線按我）
電話：3956 9298
營業時間：星期一至五 07:00 - 23:00
星期六 07:00 - 17:30
星期日及公眾假期 休息
外賣自取：可
外賣送餐：送（不過中午時間未必夠人手送，最好打去問問先）
