萬分期待嘅大堡礁 Great Barrier Reef 我嚟啦！
對於大堡礁嘅環境保護同生態價值重要性，都係眾人皆應該知該嘅事，唔知道嘅自己去搵好朋友Google 或Wiki 問下先！
而今天嘅重點行程，應該話係Cairns 嘅行程重點，就係嚟呢個世界最大最長嘅珊瑚礁群，欣賞最佳嘅海底奇觀。
真係，一世人一定要嚟大堡礁睇一次。
前篇
最初想嚟大堡礁嘅時候，上網搵過當地旅行社攞資料，發現營辦大堡礁嘅團係非常多，因為大堡礁嘅佔面積係他媽的大，基本上係跨越澳洲嘅東北部海岸，所以會有南礁北礁，仲有近岸大堡礁同外堡礁等等嘅分法。
而每一個團都會有唔同嘅活動，有以船為團，有以地點為團，浮潛係活動基本野，另外仲會有深潛、戴頭盔嘅海底慢步、玻璃底船、半潛水艇、獨木舟、Norman Reef / Moore / 綠島嘅海上平台嘅固定海底觀察等等，最初都諗左好耐揀邊間好呢。
整理過後，唔計價錢，應該可以Base on 幾點考慮：
一）易唔易暈船－易嘅話要近岸／海上平台／大型船
二）英文能力高低－低嘅需要搵中文船員多
三）諳水性與否－不諳水性要搵海底觀察室／半潛艇／玻璃底船
四）要唔要玩直升機睇大堡礁－通常要玩直升機嘅一定有海上平台先有
如果要齊晒上面嘅野，Um.....亦即係話可以畀多啲人玩，即係代表咩呢，多人嘅地方就多破壞......Well.....尤其係中文團，所以一般黎講外堡礁兼無乜其他野玩船去嘅礁會靚好多。
船都有Sell 佢哋嘅主打，下面搵左部份係Local Tour 比較多Asian 團嘅船做下比較，成個GBR 嘅Tour 當然唔只咁少：
QuickSliver－Agincourt Reef，主打外堡礁＋海底觀察站＋半潛水艇＋海底漫步＋直升機，不一定有中文船員
Great Adventures－Norman Reef，主打外堡礁＋海底觀察站＋中文船員＋玻璃底船＋直升機（另外Great Adventures 都有做綠島）
Opsrey－Saxon or Norman，Hasting Reef，主打外堡礁＋半潛艇＋直升機
Reef Experience－Hasting Reef，主打外堡礁＋玻璃底船
Big Cat / Reef Rocket－綠島，主打近岸大堡礁＋大量中文船員＋玻璃底船＋海底漫步＋半潛水艇＋直升機
Sunlover－Fitzroy Island／Moore Reef，主打近岸中礁＋大量中文船員＋玻璃底船＋半潛水艇
Silversonic－Agincourt Reef，主打外堡礁
Silverswift－Flynn, Pellowe, Milln and/or Thetford Reefs，主打外堡礁
我哋想要少人嘅團，無人想迫住旺角咁睇珊瑚囉，又唔需要主打可以容納多人嘅大型船同海上平台，熟水性嘅我哋又唔需要玩畀唔識游水嘅人玩嘅玻璃底船同半潛艇，始終係想親身落水睇下大堡礁嘅美嘛，所以我地回歸基本，揀船程又遠又大浪嘅外礁同除左浮潛同深潛就無其他野玩嘅船－Silversonic。
Silversonic 比起其他大型船係會較貴，但係佢包wet suit 不另收費、浮潛可以自己拎相機落水（有船係唔畀人拎相機落水要人買相），深潛體驗唔準帶相機確保體驗人士自身安全，睇嘅礁較靚同未被破壞得咁多，而且係去三個唔同嘅潛點，平衡過後仍覺得值得同可靠，最後當然覺得物有所值添啦！
遊記
一朝早七點幾旅遊大巴就喺Backpacker 接我哋上車啦（Package 包接送），咁啱架車係新旅遊巴，坐得都幾舒服，個幾鐘車程八點半就去到Port Douglas 啦～
Port Douglas 係除Cairns 之外另一個出Great Barrier Reef 嘅主要海港，係度出發嘅Tour 唔多，主要都係出較靚嘅外礁，而因為車程遠離Cairns 所以會好早就出發。
係入面Reception 交低F.I.T. Travel 畀嘅Voucher 同登記之後就可以入去碼頭嚕
唔單只Tour船，好多當地居民嘅船都泊係呢個碼頭度
出發當時天氣唔多好，個心仲係度諗：哎，天陰又落雨又大風，實大浪又睇唔到靚珊瑚兼且落水凍死啦......
船員早就已經係度預準好接我哋
呢架係Quicksilver 旗下嘅Wavedancer 雙體帆船，會出大堡礁嘅小島，唔係主力潛水，但係好天嘅時候坐帆船曬住太陽出海應該好爽YY
再行終於見到我哋坐嘅Silversonic，有D 似隻大遊艇，隔離就銀灰色果隻就係Quicksilver
（順帶一提 Quicksilver 係個大堡礁幾大下嘅集團，旗下有Quicksilver 船、Wavedancer 船、Great Adventures、Ocean Spirit 船、Poseidon 船、Green Island Resort、Silverswift 船當然仲有即將會上嘅Silversonic 等等，咁大個集團啦喎，總需要有人做野，想搵工作又唔識人介紹嘅就自己搵下佢嘅公司email 試下啦）
Let's Go 上船出發嚕！
上船無耐就大風大浪，但係再過左陣就放晴啦！超好天！
仲見到全彩虹，係全彩虹呀！一條完整嘅彩虹由海面伸延到海面嘅另一邊，仲有雙彩虹添！
It was our lucky day！
上船填完form 同簽咗身體合適落水declaration 之後，工作人員就開始叫報左初次潛水體驗嘅人同安排教練，咁啱船上有一個台灣教練Ken（Silversonic 唔一定有中文船員），所以我哋共8個華人就被安排左由佢教我哋潛水器材點用，落到水要做咩野平衡耳壓同點呼吸，要知道嘅手令，見到咩生物可以做咩手勢表示之類，講得非常詳盡。
另外當時都比較大浪，而有幾個人一開始已經暈船浪，佢都有安排坐較中間位置同教我哋望遠景同埋令自己凍啲，還好我去程同返程都無暈浪，但Casey 返黎果程就最終頂唔順...
船尾處已經預備好Scuba Diving 用品，除咗我哋呢啲初次體驗潛水人仕Introductory Divers，仲有唔少係有牌嘅Certified Divers，更有啲係自己帶晒成套Gear 過嚟嘅人！可以証明呢個Tour 唔係只係for 新手玩。
教練話我哋可以係三個潛點揀一個嚟潛，通常如果唔係暈船暈得太唔舒服都建議第一個潛點潛左先，因為如果去到潛點唔適合初次體驗潛水就唔畀潛架啦。
呢套就係我嘅Gear，第一次揹樽，其實支樽都真係好重，Casey 上水果陣仲因為個樽太重差啲上唔返水～Keke～
船尾有位置放用完潛水相機要洗浸淡水嘅盤，我果部Olympus TG-850 落完都要浸一陣洗走鹽份先
我哋第一次深潛體驗就係咁架啦！（呢張相係我後尾影人哋，唔係我哋嚟XD 買相好Q貴一張一張計.....）
5 個人手繞手咁潛水遊覽，我哋果陣仲見到有海龜同鯊魚添呀！近睇海龜同珊瑚真係好靚！
雖然我熟水性，但第一下潛落去果陣都驚架，之前識個台灣朋友唔識游水都玩深潛體驗結果佢驚到咩都睇唔到，至於游水比我更叻Casey 嘅呢，原來佢個Mask 入水呀.....結果佢要一邊睇，一邊用手按住個鏡.....睇得無咁過引呢.....
深潛體驗咗半個鐘左右就上返水，休息一下就開船往下個潛點！
船程中途廣播話如果想去浮潛Snorkeling 就可以去船尾聽Briefing，有靚女講Briefing 呢XD
大約係介紹下呢個礁嘅安全範圍同有咩睇，邊度睇得多靚嘢之類，仲有講有Guided Snorkel Tour 可以跟埋一齊，係水度會再講下啲生物咁。同埋都有再三提醒小心要愛護大堡礁哦～
去到第二個礁區，就咁係船上面已經清到見到約幾米下地方，超靚超清！
工作人員都已經落水檢查視察
由於係供應午餐時間，所以呢個礁會停得比較耐，我哋都食返少少嘢先～
蝦真係新鮮同甜，其他野食不過不失啦，但飯係超難食，真係超難食X(！
食左啲嘢就落水浮潛影相嚕～
呢個大堡礁嘅珊瑚真係好靚，係香港都有去過海下同東坪洲浮潛，但係同大堡礁比根本係兩個世界，
真係好靚，浮潛唔洗深潛體驗咁緊張可以睇真啲珊瑚同海洋生物～
呢度嘅珊瑚好多色彩，好多類種，只能講句Awesome！
仲見到好大隻嘅蚌，呢隻叫做細嘅已經有成隻前臂咁大
仲有好多唔同種類嘅魚，Sorry 我對魚嘅認識只有魚，魚同埋魚.....XD
呢個點嘅水，係可以清到好似無人游嘅泳池咁，能見度高到望到應該五十米，水深應該唔到十米或者左右吧
（當然要睇佢地揀嘅潛點同本身天氣好唔好）
靚到好似假咁，亦難怪有人話去過大堡礁潛水，去到其他地方潛水就會覺得無咁吸引
完完全全享受係海中仙境，海中森林嘅世界入面
放眼都係珊瑚，魚，海洋生物
Casey 似唔似係個好大嘅魚缸入面游緊水咁？
去到第三個潛點，水深較深，浪亦都較大同水都無咁清，天氣又無咁好，睇嘅野相對上無咁靚，但係仲係有好多珊瑚同海洋生物可以睇
玩深潛嘅人今次就可以落得深啲
佢係咪Nemo 啲朋友嚟？
仲意外影到海蛞蝓係海度飛呀飛呀～好搞笑～
睇左成日大堡礁，都玩到攰啦，玩到四點左右就返航啦。
大堡礁真係好靚，睇到唔想走，去過一次大堡礁潛水應該會好似我哋咁愛上咗。
又完成咗Australia Working Holiday Must-Do List 嘅其中一樣野！Yeah！
參加潛水體驗會有張Cert 送架，梗係要同張Cert 同埋隻船合照啦～
（丫...相中嘅女仔其實唔認識架～XD）
Hope I can back to this Awesome Great Barrier Reef again!!!
Remark：
1. 大堡礁真係世界瑰寶，去玩嘅都要盡量減沙對佢嘅破壞同保護自己以免受傷，不要觸摸珊瑚及海洋生物，亦唔好貼太近，尤其係硬同有刺嘅珊瑚同生物，可以界到好深
2. 唔好用太陽油落水，太陽油對海洋生物有毒，出得嚟玩預左曬黑啦
3. 船上通常都有暈浪藥，但好怕暈嘅出發前就好食定先，上船再補
4. 船上有淡水沖身但唔好學強國人咁係船上沖涼，一嚟阻住條喉，二嚟啲水直落海.....
5. 船上廁所通常都係嘔吐物嘅溫床，去廁所前畀個廁所吹吹風無咁臭.....
_______________________________________________________________________
Local Tour Package 資料：
F.I.T. 築夢套餐是包括：
（節録於F.I.T. 網頁）
1. 14000ft高空彈跳(包珍貴DVD及相片)
2. 大堡礁浮潛深潛一次,免費浮潛導覽,浮潛免費指導,燒烤BBQ自助午餐,澳式音樂娛賓,下午茶,
3. 瀑布,湖泊,雨林,高原觀光,帕羅尼拉公園(Paronalla Park)入場卷,國家公園之稅費,早茶咖啡,得獎美味鬆餅輕食下午茶,義大利豪華自助午餐,火山湖觀光
整個套餐AUD$615/人，然後有YHA 咭或者ISIC 咭（我們用IAE 寫著ISID的"學生証" XD）可以有減AUD$20
後尾我們upgrade Great Barrier Reef 團至呢個Silversonic 船團，已經包括Cairns 的來回接送+一次深潛體驗
埋單價AUD$695/人（當時1兌7，約HKD$4800 左右）
F.I.T. 築夢套餐網頁:
http://www.fittravel.com.au/travel_detail.php?pid=NjU=
Silversonic 資料：
http://www.silverseries.com.au/sonic.htm
_______________________________________________________________________
另推介曾在唔同Great Barrier Reef 船玩過，包括Silversonic 嘅專業玩家文章：
http://marinedessert.blogspot.hk/2014/06/cairns-silversonic-agincourt-reef.html
_______________________________________________________________________
全文同步於：
