講沙田嘅良心小店，第一間諗到嘅非盛記莫屬，盛記更加好代表到香港人打不死嘅精神，盛記嘅故事真係可以有排講，由十幾年前領匯加租差啲被趕絕無得做，派麵俾老人家，舖頭非常有特色嘅室內裝修，晚市增做火鍋，至上年有份撐眾新聞義賣。
所以我呢個區外人每一次嚟到沙田想食嘢嘅首選一定係盛記先，除咗佢地嘅人情味，係佢地做麵家開始，慢慢增加其他唔同嘅選擇，而且味道一直保持得唔錯，做到老闆細B哥成日講嘅想嚟食嘢嘅人食得開心。
而今次去食，仲出埋燉湯，一試之下佢哋嘅燉湯真係比專門做燉湯嘅食店出色！係盛記都食咗好幾年，估唔到都仲可以有驚喜！真心值得推介！
入嚟原本只係想食個飯，點知見到貼住有燉湯，即刻諗都唔洗諗叫咗一客，燉湯日日唔同，今日嘅係燉猴頭菇，啱晒我口味。
一上黎見到湯蓋過盅蓋就知呢盅燉湯唔惹少，顏色濃濃，油量適中唔會好油，未打開已經聞到好香好香嘅香氣
一打開，湯色清澈而色濃，啲料滿到出晒嚟，剩係咁望已經覺得呢盅燉湯值回票價
真係非常足料，用咗兩隻雞腳、三粒排骨、三粒猴頭菇、桂圓、紅棗，仲食到有少片薑。
飲落去味道非常香濃清甜，完全飲得出各種材料混和，燉咗一段時間嘅精華，而且湯汁好重膠質嘅黏口感。猴頭菇都有好好處理過，無食到澀味。
真心估唔到盛記做麵幾好，做豉油雞好食，打邊爐材料夠新鮮，做燉湯都做得非常出色。
當然其他野食都非常好食，而且價錢都好抵
牛尾燜得淋身入味，唔會爛晒留有咬口，份量亦都好足
無骨豉油雞都係盛記名物，以前會做瓦撐豉油雞，宜家做無骨，更方便食客，而且雞肉嫩滑，份量都好足料，記得配埋葱絲食
盛記呢度嘅室內設計都係非常特別，有講笑話細B哥係俾食店耽誤嘅藝術家。
喜歡攝影嘅總會係店內搵到唔同嘅角度影到靚相。
盛記嘅午餐只係做星期一至六，星期日係無飯的，價錢只係$48連飲品。
就係右邊果張紙吸引到我叫咗個燉湯嚟飲，推介！
良心食店，除咗派麵，仲會派蛋糕，而附近都有間麵包舖良心價賣麵包，都係會派麵包
盛記麵家
地址：沙田瀝源熟食中心5號舖
電話：26926611
注意日頭主要做飯套同粉麵，晚市就會做火鍋，而星期日日頭無飯餐只有麵食
